Asoman vidros rotos no fondo da mirada,
Espellos que quebraron de súpeto co vento,
Fragmentos de xanelas, de grandes ventanais,
Abertos para sempre ao soño da distancia.
Eu moio os vidros rotos, redúzoos a ser po,
Brutal os esnaquizo, fariña de cristal,
E fican como fotos, fundidas pola luz.
Areas da memoria, minúsculos espellos
Que prenden un relampo de lumes e de fósforos
Son restos de figuras, cerámicas partidas,
Cristais que se afogaron nas augas dunha lúa
E agora son olladas, resquicios de visións.
Os vidros que conservan secretas perspectivas,
Un ángulo dos ollos tomando a realidade,
Domando un horizonte de corpos e de casas.