Son curtas estas noites

Que apousan sobre a abóveda do mundo.

Son curtas pra que escoites

Virar por un segundo

As rodas que dan voltas no profundo.

 

E longas as xornadas

Detidas como estatuas na fronteira

Das tardes clausuradas,

Dos fumes da fogueira

Aromas de limón e laranxeira.

 

E rápidos os ríos.

Os cursos dos torrentes que devalan

Son rápidos e fríos,

Sinal de que regalan

Cristais que no diamante se propalan.

 

E lentas son as horas.

E lentos son os corpos abafados.

E os corpos das pastoras

Felices nos seus prados,

Nos ritos destes meses culminados.

 

O mel desta mestura

Que os labres xa quixeran gorentar

Labrado na moldura

Do outono xunto ao mar,

Azucre do deserto a supurar.

 

O viño desta cea,

O caldo que labraron nas ribeiras

Na luz da lúa chea,

Nas vides, nas madeiras,

Labores das vendimas derradeiras.

 

A froita que culmina

A carta señorial deste convite

A carne determina

Que acenda ou dinamite

As fames que do corpo nos transmite.

 

Descargar libro enteiro

A mácula feroz da fermosura en formato pdf

A mácula feroz da fermosura en forma epub