Amémonos no azar,

Escuros labirintos os da sorte;

Tracemos polo mar,

Camiños cara ao norte,

As gratas singraduras para a morte.

Deámonos o abrazo

Infindo das que saben que morrer

É forma doutro lazo

Que atinxe o propio ser,

O bucle do regreso e do volver.

E así de mans unidas

Deitadas sobre herba a contemplar

A luz das avenidas

Vexamos sobre o mar

O mar do firmamento a rebosar.

Que todo está fundido,

No círculo do cosmos a soidade,

O sangue no latido,

A xente na cidade,

O espazo a camiñar na liberdade.

Descargar libro enteiro

A mácula feroz da fermosura en formato pdf

A mácula feroz da fermosura en forma epub